當你走入一間文青咖啡廳，飲淡茶食個餅督下手機，你會發現Cafe老板好鐘意揀Bossa Nova 黎做佢鋪頭嘅BGM，聽落去夠哂chill，忙裏偷閒，又靜靜地咁好適合大家細細聲傾偈。香港都有紅過下啲主要唱Bossa嘅女Vocal例如Lisa Ono小野麗莎，同埋來自新加玻嘅Olivia Ong, 但柔情嘅背後其實隱含一段巴西政治審查史。
1930年巴西Getúlio Vargas嘅革命後開始工業化，但亦同時開始咗軍事政權，示威四起，1954-55年間瘋狂換左三次總統，政局動蕩不安。巴西嘅領導階層好想可以得到其他強國嘅扶持，但又意識到自己個政局咁亂，由多民族形成嘅所謂巴西人，國民身分認同又唔係好強，有時都寧願話自己係某個地區嘅人多過話自己係巴西人，所以好需要一啲野去連繫國民同埋掩飾混亂嘅國情，等其他大國見到自己靚靚仔仔咁。音樂就成為咗其中一個工具，政府希望音樂人可以製造一啲開心、舒服、明快、正面，又可以表現到巴西特色嘅聲音，歌頌巴西文化，Bossa Nova就成為樂壇及官方嘅寵兒，其著名作曲家Antônio Carlos Jobim，就係喺咁嘅時代背景下寫左好多Bossa名作例如The Girl From Ipanema(1962)、No More Blues(1958)。
1968 , 軍事政變再發生，隨之而來嘅係新法例 Institutional act 5，賦予政府權力去審查包括音樂嘅任何媒體，不容許對政權嘅批評，藝術需要得到官方嘅認可。法例大受巴西人反對，新藝派Tropicália抬頭，將直白嘅反對聲音放進藝術，而佢地最睇唔起嘅音樂，就係假作和平不合世情嘅Bossa Nova。
前文提及嘅Antônio Carlos Jobim，可以話係對Bossa Nova甚至巴西音樂最具影響的作曲家。佢寫下超過300首歌，其中一啲歌後來有人發現帶有政治訊息。以呢個Post播嘅Sabia為例，取材自著名嘅巴西詩，講述旅人到左巴西之後覺得好正，離開之後都係忍唔住想番黎。Jobim嘅版本就改成係旅人再番黎巴西之後發現呢個地方已經唔係好似以前咁，而呢首歌嘅填詞人Chico Buarque正正就係因為另一首歌被審查畀軍政府拉咗。
「哎呀呢首Bossa聽落好似靜靜地好簡單wor, 我可唔可以學下」
Jobim嘅歌有一個好大嘅特色，就係就咁聽好似啲Melody好鬼簡單冇咩野咁，但其實佢同背後和弦結構嘅關係意外地複雜，調性唔穩定，有時又係咁轉key，只係Jobim好聰明咁左避右避，避開哂和弦入面唔和諧嘅音，又用啲好靚嘅Voicing手法，令到個最終畫面聽落去好似一首好舒服好普通嘅歌。無數即興萌新打開Chord譜後O嘴，葬身於The Girl From Ipanema B Section同埋Wave 嘅A Section，我以前學到好沮喪嘅時候都transcibe下啲早期大師點玩，極度懷疑佢地喺某啲棘位都係避重就輕，原來畀Jobim玩死嘅唔只我一個。
唔知有意定無意，但係咁樣看似簡單陽光，實際苦澀深奧嘅音樂，好似就比起言語，更加準確、到肉咁描寫左當時巴西嘅氣氛。又或者，其實Jobim都冇諗過咁多秘密訊息，填詞都冇諗過反政府純粹唔好彩，但係真係生活喺咁嘅時代，就好自然會創作出屬於果個時代嘅聲音。
文：Timothy Wan